रौतहट । रौतहटको कटहरिया नगरपालिकाको कार्यालय र खानेपानी उपभोक्ता समितिको विद्युत लाइन काटिएको छ। लामो समयदेखि विद्युत महसुल नबुझाएपछि नगर कार्यालय र खानेपानी उपभोक्ता समितिको विद्युत लाइन काटिएको हो।
विद्युत आपूर्ति नहुँदा पछिलो तीन दिनदेखि कटहरिया नगरपालिकाको सम्पूर्ण काम अवरुद्ध भएको छ। कटहरिया ५ का वडा अध्यक्ष सर्फलाल गुप्ताले विद्युत आपूर्ति नहुँदा नगरको कार्यालयको सम्पूर्ण कामकाज ठप्प भएको बताए । त्यसैगरी खानेपानीको विद्युत आपूर्ति नहुँदा कटहरिया ४ र ५ वडाका १६ सय सेवाग्राही शुद्द खानेपानीबाट वञ्चित भएका छन्।
नेपाल विद्युत प्राधिकरण मौलापुरका प्रमुख दिनेश यादवले नगरपालिकाले करिब ४ लाख र खानेपानी उपभोक्ता समितिले १६ लाख रुपैयाँ विद्युत महसुल बुझाउन बाँकी रहेको बताए । सो रकम नबुझाएकाले मिटर खोलेर ल्याइको उनको भनाइ छ ।
यसैबीच कटहरिया नगरपालिकाका प्रमुख प्रशासकीय अधिकृत हरिशंकर कुमार सिंहले मंगलवार विद्युत प्राधिकरण मौलापुरको नाउँमा तीन लाखको चेक काटिसकेकाले आजदेखि विद्युत आपूर्ति हुने जानकारी दिए ।
उता खानेपानी उपभोक्ता समितिका अध्यक्ष योगेन्द्र साहले कटहरिया नगरपालिकाले पानीको महसुल नगरपालिकाले निःशुल्क घोषणा गरेको तर विद्युत महसुल नबुझाएको कारण समस्या भएको बताए ।
