सिरहा । सिरहा प्रहरीले हत्या अभियोगका फरार एक युवकलाई ६ वर्षपछि पक्राउ गरेको छ ।
कर्जन्हा नगरपालिका–१० का शशीभूषण प्रसाद साहको हत्यामा संलग्न रहेको आरोपमा प्रहरीले मिर्चैया नगरपालिका–१ का २७ वर्षिय नन्दा भन्ने उमेश उरावलाई पक्राउ गरेको छ । साहको २०७४ असोज २३ गते आफ्नै घरमा घाटीरेटी हत्या गरिएको थियो । उरावलाई जिल्ला प्रहरी कार्यालय सिरहा र ईलाका प्रहरी कार्यालय मिर्चैयाकोे संयुक्त टोलीले मिर्चैया नगरपालिका–१ घरबाटै नियन्त्रणमा लिएर जिल्ला अदालत सिरहामा पठाइएको जिल्ला प्रहरी कार्यालय सिरहाका सूचना अधिकारी रविन्द्र राज पाण्डेले जानकारी दिएका छन् ।
साहलाई निजकै घरमा नन्दा भन्ने उमेश उराव समेतका व्यक्तिहरुले रिसिईवीको कारणले धारिलो हतियार प्रयोग गरी घाँटी काटेर हत्या गरेको प्रवक्ता डिएसपी पाण्डेले बताए । उक्त घटनामा उवारसँगै सोमन भन्ने राम ईश्वर कापर र रुपेश यादवलाई यसअघि नै पक्राउ गरिएको थियो । पक्राउ परेका कापर र यादवलाई जिल्ला अदालत सिरहाले जन्मकैद फैसला गरेको थियो । पक्राउ परेका दुवै जना जिल्ला कारागार सिरहामा रहेका छन् ।
